ಅನಿಶಾ…

ನಾನು ನಡೆದಷ್ಟೇ ನನ್ನ ದಾರಿ
ಹಾಕಿದ ಹೆಜ್ಜೆಗೆ ದೂರ ಅಂಜಿಕೆಯೇ

ಗುರಿ ಇಲ್ಲದ ಪಯಣಕೆ ದಿಕ್ಕಿಲ್ಲ
ದಿಕ್ಕು ನೋಡಿ ಹರಿದೀತೇ ಬೆಳಕು

ಈ ದಿಕ್ಕಿಗೆ ಹೆಸರಿಟ್ಟವನು ನಾನಲ್ಲವೇ

ಒಂದು ಹೆಜ್ಜೆ ಹಿಂದಾಗದೆ ಮುಂದಾಗಲಾರೆ

ರೆಕ್ಕೆ ಇಲ್ಲದ ಹಕ್ಕಿ ಹಾರುವ ಕ್ಷಣ ಬಲ್ಲೆಯಾ
ಬಂದಂತೆ ಹೋಗುವ ಈ ತ್ರಾಣ ಅದೇನು ಹಕ್ಕಿಯೇ ಹಾರಲು

ಈ ಆಸೆ ಸಾಯದೆ ಆ ಆಸೆ ಹುಟ್ಟದು
ಕುರುಹಾದ ದೇವರಿಗೆ ಹಿರಿದಾ ಬಯಲು

ಯಾವ ದಾರಿಯೂ ಕದಳಿಗೆ ಕರೆದೊಯ್ಯದು ನನ್ನ
ಅದು ಅನಿಶಾ
ನನ್ನ ತನು ಕದಳಿಯಲ್ಲ ಮನ ಕದಳಿಯಲ್ಲ
ಈ ಭಾವ ಭ್ರಮೆಗೆ ಅಂಜಿಕೆಯೇ
ಭಾವ ನಿಷ್ಠೆ ಇಲ್ಲದವರು ಧ್ಯಾನದಲಿ ಗೆಲರು.