ಆಕಾರ-ನಿರಾಕಾರ

ಇರಯ್ಯಾ
ಕಾಯುವವನೇ ಇರದಿರುವಾಗ
ನಿನಗೇತರ ಅವಸರ
ಕಾಯುತ್ತಾನೆಂದು ಕಾಯುವೆಯಲ್ಲಾ
ಸಾವ ಕಾಯುವ ನ್ಯಾಯ
ಅದಾವುದಯ್ಯಾ ಕೇಡಿಲ್ಲ
ಅಳಿಯೆನೆಂದು ಹಲ್ಲ ಮಸೆಯದಿರು
ಕಾಯ ಕಾಯದು

ಆಕಾರಕೆ ಒಲಿದ ಕಣ್ಣು
ನಿರಾಕಾರಕೆ ಮಣಿಯದೇ

ಬೆಳಕಿಗೆ ಬಾಗದು ನೆರಳು.

* * *
ಈ
ಕಾಣದ ಆದಿ
ಕಂಡರಿಯದ ಅಂತ್ಯ
ಎರಡರ ಮೋಹ ಈ ನಾನು

ಎರಡೂ ತುಂಬಲಾಗದ ಬರಿದು

ಜೇಡ ಜಾಲಕೆ ಅಂಟಿದ ಇಬ್ಬನಿ
ಜೇಡನ ಕೊರಳಿಗೆ ಸುತ್ತಿದ ನೀರ ಮಾಲೆ

ಈ ಕಣ್ಣಾಚೆ ಏನೋ ಇದೆ
ಬೇರಿಲ್ಲದ ಬಯಕೆ ಚಿಗುರು

ಮಗುವೇ ಇಲ್ಲಾ
ಸಿಕ್ಕಾಳೆಯೇ ತಾಯಿ

ನೀರಿನಂತೆ ಹರಿದೂ ಕೂಡುವುದು

ಒಬ್ಬನೇ ಹೋಗುವಾಗ ಮತ್ತೊಬ್ಬ
ಬರುವುದು ಗೊತ್ತಾಗದೇ…

ಎಷ್ಟೊಂದು ಶಬ್ದಗಳು
ಕಿವಿ ಕಿವುಡಾಗಿದೆ

ಈ ಆಕಾರ ಮನೆಗೊಂದುರೂಪು
ನಿಜ ಬಳಸುವುದೆಲ್ಲಾ ನಿರಾಕಾರ